Boyd Sense: News

Home / News

Showing posts with label News. Show all posts

ត្រឹមតែរូបថតតែ២សន្លឹក ត្រូវបានអ្នកលេងបណ្តាញសង្គមធ្វើការចែករំលែកជាបន្តបន្ទាប់

រាជធានីភ្នំពេញ: រយៈពេល១៦ម៉ោងបន្ទាប់ រូបភាពទាំងនោះ ត្រូវបានទំព័របណ្តាញសង្គមមួយឈ្មោះ “Because of you” ចែកជាតំណរហូតដល់១១០០ ជាមួយនឹងប្រយោគមួយឃ្លាថា ៖« ខ្ញុំឃើញមនុស្សមួយចំនួនShareរូបរបស់គាត់ហើយបានប្រើពាក្យមិនសមរម្យដល់គាត់ជាច្រើនដែរ..

ខ្ញុំគ្រាន់តែឆ្ងល់ថា.. ហេតុអីបានទៅShareរូបរបស់គាត់ហើយជេរគាត់ទៀត សុំសួរតិចមើល? តើគាត់បានទៅធ្វើអីអ្នកឯងបានជា អ្នកឯងនឹងប្រើពាក្យសំដីមិនសមរម្យទៅលើខ្លួនគាត់ផ្ទាល់៕

គាត់គ្រាន់តែPostរូបSexyតែគាត់សោះ មានបានទៅធ្វើអំពើច្បាប់ខុសក្នុងប្រទេសអីណា.. ឥលូវឧទាហរណ៍ថាមានគេShare រូបអ្នកឯងដូចគ្នាថែមទាំងប្រើពាក្យមិនសមរម្យដាក់អ្នកឯងដូចគ្នាដែរ ? ខ្ញុំជឿថាអ្នកឯងក៏ចេះអន់ចិត្ត ខឹង ដូចជាគេដែល…

ប្រមុខរាជរដ្ឋាភិបាលកម្ពុជា ថាការដាច់ចន្តរអគ្គិសនី ថ្ងៃចុងក្រោយនៃពិធីបុណ្យអុំទូក មិនជាប់ពាក់ព័ន្ធ នឹងសញ្ញាការធ្វើភេរវកម្មអ្វីនោះទេ

ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន នាយរដ្ឋមន្រ្តី នៃព្រះរាជាណាចក្រ កម្ពុជា បានចេញឃ្លីបវីឌីអូពិសេសមួយដែល មានរយៈប្រមាណជិត៦នាទី ដើម្បីបកស្រាយ និងជម្រាបទៅដល់សាធារណៈជន ដើម្បីបញ្ចៀសក្ដីបាម្ភថា ការដាច់ចន្តរអគ្គិសនី ថ្ងៃចុងក្រោយនៃពិធីបុណ្យអុំទូក អាចជាប់ពាក់ព័ន្ធ នឹងសញ្ញាការធ្វើភេរវកម្ម។

ភ្លាមៗក្រោយមាន ការផ្ញាក់ផ្អើលពីបណ្ដារអ្នកប្រើប្រាស់បណ្ដាញទំនាក់ទំនងសង្គម ពីករណី ដាច់ចន្តរអគ្គិសនី នៅក្នុងទូទាំងប្រទេសកម្ពុជា នៅយប់ថ្ងៃទី២៦ ខែវិច្ឆិកា ឆ្នាំ២០១៥ សម្ដេច អគ្គមហាសេនាបតីតេជោ ហ៊ុន សែន បានថ្លែងជម្រាបប្រាប់ទៅដល់ប្រជាពលរដ្ឋទូរទាំងប្រទេស ពិសេសអ្នកប្រើប្រាស់បណ្ដាញទំនាក់ទំនងសង្គម សម្ដេចបានបង្ហោះសារពិសេសនោះ ក្នុងFacebook Page របស់សម្តេចថា ការដាច់ចរន្តអគ្គិសនីនៅទូទាំងរាជធានីភ្នំពេញ និងតាមបណ្តាលខេត្តនានា ស្ទើរពេញផ្ទៃប្រទេសនេះ គឺមិនមែនជាការធ្វើភេរវកម្មអ្វីនោះទេ គឺជាការដាក់ចរន្តអគ្គិសនីតែម្តង ដែលជាចរន្តទិញមកពីប្រទេសវៀតណាម។

សម្តេចបានថ្លែងបញ្ជាក់ថា «ការដាក់ចរន្តអគ្គិសនីនេះ មិនមែនជាចេតនាខាងនយោបាយរបស់ខាងណាមួយ ឬក៏មិនមែនជាឧប្បទ្ទហេតុដែលអាចកើតឡើងនូវការវាយប្រហារភេរវកម្មនោះទេ សង្ឃឹមថាប្រជាពលរដ្ឋរបស់យើងមានការយោគយល់ អធ្យាស្រ័យចំពោះអ្វីដែលបានកើតឡើង ក្នុងពេលប្រជាពលរដ្ឋកំពុងរីករាយសប្បាយក្នុងយប់ចុងក្រោយ នៃព្រះរាជពិធីបុណ្យអំទូក អកអំបុក បណ្តែតព្រះទីប និងសំពះព្រះខែ»៕

Posted by Samdech Hun Sen, Cambodian Prime Minister on Thursday, November 26, 2015

កម្ពុជា នឹងចំណាយ ១៥០លានដុល្លារ សម្រាប់អភិវឌ្ឍផ្លូវជាតិលេខ ៥ ពីភ្នំពេញទៅប៉ោយប៉ែត

Business News

ភ្នំពេញ៖ ក្នុងជំនួបទ្វេភាគីរវាង ថ្នាក់ដឹកនាំកំពូលរដ្ឋាភិបាលជប៉ុន និងថ្នាក់ដឹកនាំរដ្ឋាភិបាលកម្ពុជា ថ្នាក់ដឹកនាំជប៉ុនបានប្រកាសថា ខ្លួននឹងផ្តល់ប្រាក់កម្ចីសម្បទានចំនួន ១៥០លានដុល្លារអាមេរិក សម្រាប់ការអភិវឌ្ឍផ្លូវជាតិលេខ ៥ ពីភ្នំពេញ ទៅប៉ោយប៉ែត នេះបើយោងតាមប្រសាសន៍របស់ ឯកឧត្ដម កៅ គឹមហួន រដ្ឋមន្ត្រីប្រតិភូមន្ត្រីរដ្ឋាភិបាល បានឲ្យដឹងនៅក្នុងសន្និសីទសារព័ត៌មានមួយ កាលពីពេលថ្មីៗកន្លងទៅនេះ នៅព្រលានយន្តហោះអន្តរជាតិភ្នំពេញ។

យ៉ាងណាមិញ ទាក់ទងទៅនឹងការចាប់ផ្តើមអភិវឌ្ឍផ្លូវជាតិមួយនេះ មិនទាន់បានដឹងជាក់ច្បាស់នៅឡើយនោះទេ។

ផ្លូវជាតិលេខ ៥ ជាផ្លូវសេដ្ឋកិច្ចដ៏សំខាន់ មិនគ្រាន់តែចំពោះកម្ពុជាប៉ុណ្ណោះទេ ប៉ុន្តែសម្រាប់ប្រទេសក្នុងមហាអនុតំបន់ទន្លេមេគង្គផងដែរ។ ផ្លូវជាតិលេខ ១ ផ្លូវជាតិលេខ ៥ និងស្ពានអ្នកលឿង ជាផ្នែកមួយនៃផ្លូវជាតិអាស៊ាន ហើយវាគឺជាផ្នែកមួយ នៃរបៀងសេដ្ឋកិច្ចភាគខាងត្បូងនៃមហាអនុតំបន់ទន្លេមេគង្គ។ បន្ថែមលើនេះទៅទៀត ការអភិវឌ្ឍផ្លូវជាតិលេខ ៥ នេះ នឹងកែលម្អការដឹកជញ្ជូន និងភ័ស្តុភារ ហើយជាលទ្ធផលនឹងបង្កើនការធ្វើពាណិជ្ជកម្ម និងការអភិវឌ្ឍសេដ្ឋកិច្ច សម្រាប់ប្រទេសកម្ពុជា និងសម្រាប់ប្រទេសក្នុងមហាអនុតំបន់ទន្លេមេគង្គផងដែរ។

ជប៉ុនគឺជាប្រទេសមួយ ដែលបានផ្តល់ជំនួយធំជាងគេដល់កម្ពុជា។ ជំនួយជប៉ុននាំមកនូវការលូតលាស់របស់កម្ពុជា លើវិស័យហេដ្ឋារចនាសម្ព័ន្ធផ្លូវថ្នល់ ប្រព័ន្ធធានាសាស្រ្ត អគ្គិសនី ក៏ដូចជា តំបន់សេដ្ឋកិច្ចពិសេសដែលប្រការទាំងនោះ សុទ្ធសឹងតែគាំទ្រ ដោយវិនិយោគជប៉ុន ក្នុងន័យធ្វើយ៉ាងណាឲ្យមានការកើនឡើង អ្នកវិនិយោគជប៉ុន នៅក្នុងរយៈពេលប៉ុន្មានឆ្នាំកន្លងមកនេះ៕

មនុស្ស១៤៧នាក់ស្លាប់ដោយគ្រោះថ្នាក់ចរាចរណ៍ក្នុងខេត្តបន្ទាយមានជ័យឆ្នាំក្នុង២០១៥

News Soial

ខេត្តបន្ទាយមានជ័យ៖ របាយការណ៍ស្នងការនគរបាលខេត្តបន្ទាយមានជ័យ បានឱ្យដឹងថា មានមនុស្ស ប្រមាណ១៤៧នាក់បានស្លាប់ និង៤៤០នាក់ផ្សេងទៀតរងរបួស ធ្ងន់និងស្រាលក្នុងហេតុ ការណ៍គ្រោះថ្នាក់ចរាចរណ៍នៅក្នុងខេត្តបន្ទាយមានជ័យប្រចាំឆ្នាំ២០១៥នេះ ដែលបានកើត ឡើងចំនួន២៨៨ករណី។

លោកវរសេនីយ៍ត្រី សួន នីប៉ូ នាយរងការិយាល័យនគរបាលចរាចរណ៍ខេត្តបានឱ្យ ដឹងកាលពីថ្ងៃទី២៧ ខែវិច្ឆិកា ឆ្នាំ២០១៥ ថា នៅឆ្នាំនេះតួលេខអ្នកស្លាប់ និងរបួសធ្ងន់ស្រាល ដោយគ្រោះថ្នាក់ចរាចរណ៍ នៅក្នុងខេត្តនេះ ឃើញថានៅតែមានច្រើន ទោះបីករណីគ្រោះថ្នាក់ ចរាចរណ៍ដែលបានកើតឡើងមានការថយចុះចំនួន ១៨ករណីបើប្រៀបធៀបនឹងឆ្នាំ២០១៤ កើតឡើងចំនួន៣០៦ករណី។

លោកបានឱ្យទៀតថា គ្រោះថ្នាក់ចរាចរណ៍នេះបង្កដោយកត្តាមនុស្សចំនួន២៨០ករណី ដោយយានយន្ត៦ករណី អាកាសធាតុ១ករណី និងកត្តាផ្លូវ១ករណី។ មានជនសង្ស័យ ចំនួន១១នាក់ជាអ្នកបើកបរបង្កហេតុត្រូវបានកសាង សំណុំរឿងចាប់បញ្ជូនទៅកាន់តុលាការយក ទៅកាត់ទោសតាមផ្លូវច្បាប់រួចហើយផងដែរ។

លោកវរសេនីយ៍ត្រី សួន នីប៉ូ បានឱ្យដឹងបន្ថែមទៀតថា នៅក្នុងរយៈពេលនេះកម្លាំងនគរបាលចរាចរណ៍ បានចុះធ្វើការអប់រំផ្សព្វផ្សាយច្បាប់ចរាចរណ៍ជូនដល់មន្ត្រីរាជការ កងកម្លាំងប្រដាប់អាវុធ និងសិស្សនិស្សិតនៅ តាមសាលារៀននានាក្នុងខេត្តបន្ទាយមានជ័យ ដើម្បីឱ្យពួកគាត់បានយល់ចេះដឹងពីច្បាប់ចរាចរណ៍ផ្លូវគោក ហើយឱ្យនាំគ្នាចូលរួមគោរពច្បាប់ចរាចរណ៍ផ្លូវគោកនេះដើម្បីការពារ ទប់ស្កាត់ និងបញ្ចៀសនូវការរងគ្រោះបាត់បង់ជីវិតនិងទទួលរងរបួសដោយការប្រការ ផ្សេងៗ ពីបញ្ហាគ្រោះថ្នាក់ចរាចរណ៍នេះ។

គិតជាមធ្យមនៅទូទាំងប្រទេសត្រូវគេមើលឃើញថាយ៉ាងហោចណាស់មានមនុស្ស ស្លាប់ពី៥ ទៅ៦នាក់ ក្នុង១ថ្ងៃ។ មិនតែប៉ុណ្ណោះកម្លាំងនគរបាលចរាចរណ៍បានរឹតបន្តឹងនូវការត្រួតពិនិត្យ តាមដងផ្លូវនោះផងដែរ។ លោកបានអំពាវ នាវឱ្យប្រជាពលរដ្ឋទាំងអស់នាំគ្នាចូលរួមគោរពច្បាប់ចរាចរណ៍ បើកបរមានការយោគយល់អធ្យាស្រ័យគ្នាទៅវិញទៅមក គឺដើម្បីចូលរួមកាត់បន្ថយគ្រោះថ្នាក់ចរាចរណ៍នៅខេត្តបន្ទាយមានជ័យនេះ៕

ពហុកីឡាដ្ឋានជាតិមរតកតេជោ នឹងស្ថាបនារួចនៅឆ្នាំ២០២០

News Soial

ភ្នំពេញ៖ពហុកីឡាដ្ឋានជាតិ មរតកតេជោ ដែលមានចម្ងាយ១៥គីឡូម៉ែត្រ មានទីតាំងស្ថិតក្នុងខណ្ឌឫស្សីកែវ ភាគខាងជើងរាជធានីភ្នំពេញនោះ នឹងត្រូវស្ថាបនា រួចរាល់នៅឆ្នាំ ២០២០ខាង មុខនេះ។ បន្ទាប់ពីរដ្ឋាភិបាល បានជ្រើសរើសយកជម្រើសសំណង់ ពហុកីឡាដ្ឋានជាតិមរតកតេជោហើយ ក្រុមហ៊ុនបច្ចេកទេស បានធ្វើការកែសម្រួល ដោយដាក់បញ្ចូលនូវផ្ការំដួល ដែលឆ្លុះបញ្ចាំងពីវប្បធម៌របស់កម្ពុជា នៅក្នុងពហុកីឡាដ្ឋានជាតិនោះផងដែរ។

ពហុកីឡាដ្ឋានជាតិនេះនឹងធ្វើការសាងសង់ ដោយមានដំបូល ដែលអាចចាំងពន្លឺចូលបានផង និងអាចឱ្យខ្យល់ ចេញចូលបានផង ដើម្បីធ្វើយ៉ាងណាឱ្យមានពន្លឺ និងមានខ្យល់ត្រជាក់នៅក្នុងនោះ ហើយក៏មានស្រះទឹកព័ទ្ធ ជុំវិញផងដែរ។

ពហុកីឡាដ្ឋានជាតិមរតកតេជោនេះ នឹងអាចទទួលទស្សនិកជន ចំនួនប្រមាណ៦ម៉ឺននាក់ ដើម្បីចូលមកទស្សនា។ ជារួមស្ថាបត្យកម្មពហុកីឡាដ្ឋានអូឡាំពិកនេះ គឺឆ្លុះបញ្ចាំងពីវប្បធម៌ខ្មែរពិតៗ ហើយក៏បានឆ្លុះបញ្ចាំងអំពីបរិស្ថានបៃតងនៅជុំវិញទីនោះផងដែរ បន្ថែមទៅដោយហេដ្ឋារចនាសម្ព័ន្ធ និងការធ្វើ ចរាចរណ៍យ៉ាងងាយស្រួល ក៏ដូចជាសម្រាប់ការថែទាំពហុកីឡាដ្ឋានជាតិនេះផងដែរ។

ក្រុមបច្ចេកទេសនិយាយថា ពហុកីឡាដ្ឋានជាតិនេះ គឺអាចប្រើប្រាស់ជាការិយាល័យ ធ្វើការ ក៏ដូចជាកន្លែងហ្វឹកហាត់អត្តពលកម្ម កីឡាបាល់ទាត់ សម្រាប់កម្មវិធីជាតិនានា ក៏ដូចជាសម្រាប់ ការ តាំងពិព័រណ៍ផ្សេងៗ។ ម្យ៉ាងទៀត នៅក្នុងនោះក៏អាចធ្វើជាកន្លែងសម្ដែងខុនសឺត ឬការិយាល័យផងដែរ ដើម្បីជួលទាញយកកម្រៃយកមកថែទាំពហុកីឡាដ្ឋានជាតិនេះដោយខ្លួនឯង។ ពហុកីឡាដ្ឋានជាតិនេះ បើតាមគម្រោងនឹងធ្វើការសាងសង់ចប់នៅឆ្នាំ២០២០។

ជាការឆ្លើយតប ប្រមុខរាជរដ្ឋាភិបាលបានមានប្រសាសន៍ថា ការជ្រើសរើសជម្រើសពហុកីឡាដ្ឋានជាតិ ដែលមានរាងជាសំពៅនេះ គឺមានមូលហេតុថា ក្នុងប្រវត្តិសាស្ត្រចិនធ្វើទំនាក់ទំនងជាមួយនឹងបណ្ដាប្រទេស នៅអាស៊ីអាគ្នេយ៍តាមរយៈសំពៅ ហើយថ្មីៗនេះ ចិនក៏បានដាក់ចុះនូវផ្លូវសូត្រសមុទ្រសតវត្សទី២១ រួមទាំង នយោបាយផ្លូវមួយ ខ្សែក្រវាត់មួយផងដែរ ដែលនេះគឺជាការជ្រើសរើស យកជម្រើសពហុកីឡាដ្ឋានជាតិ មានចារឹកជាសំពៅនេះ។

លើសពីនេះប្រមុខរាជរដ្ឋាភិបាលក៏បានសម្ដែងនូវការរីករាយដែលពហុកីឡាដ្ឋានជាតិនេះ ត្រូវបានអ្នកបច្ចេកទេសយកចិត្តទុកដាក់ ទៅលើបញ្ហាជំនឿ និងការថែទាំពហុកីឡាដ្ឋានជាតិនេះ ដោយសម្ដេចបានមានប្រសាសន៍ថា តាមបទពិសោធន៍ កន្លងមក ការសាងសង់គឺជាការពិបាកមួយហើយ ប៉ុន្តែបន្ទាប់ ពីការសាងសង់ហើយនោះ ការធ្វើឱ្យមាននិរន្តរភាពនិងការថែទាំគឺកាន់តែពិបាកថែមទៀត៕

ហាងខោអាវឈ្មោះ ISIS ត្រូវអាជ្ញាធរចុះស៊ើបអង្កេត សង្ស័យពាក់ព័ន្ធក្រុមជ្រុលនិយម

News Soial

ចិនជាប្រទេសមួយដែលមានការប្ដេជ្ញាចិត្តខ្ពស់ និងជាគំរូដ៏ល្អក្នុងការកម្ចាត់ចោលក្រុមអង្គការរដ្ឋឥស្លាមជ្រុលនិយម ជាក់ស្ដែងក្នុងប្រទេសនេះ សូម្បីតែហាងខោអាវដែលលើកស្លាកយីហោឈ្មោះ ISIS ក៏អាជ្ញាធរចិនតម្រូវឲ្យរុះចោលភ្លាមៗដែរ នេះបើយោងតាមសារព័ត៌មាន Shanghaiist ។

ហាងខោអាវមួយនេះបានទាក់យកអារម្មណ៍របស់ប្រជាជន និងប៉ូលិសជាច្រើន ដោយសារតែឈ្មោះរបស់វា ។ ម្ចាស់ហាងខោអាវនេះគឺ អ្នកស្រី Chen Hong បានពន្យល់ប្រាប់ប៉ូលិសពីមូលហេតុដែលធ្វើឲ្យគាត់សម្រេចចិត្តយកឈ្មោះហាងដូចនេះថា វាតំណាងឲ្យពាក្យថាកាដូ ដែលជាភាសាចិនសរសេរថា (意思意思) អានថា “yisi yisi” ។

ប៉ូលិសបានចុះធ្វើការស៊ើបអង្កេតលើហាងខាងលើនេះ ដោយសង្ស័យថាមានពាក់ព័ន្ធនឹងក្រុមជ្រុលនិយមរដ្ឋឥស្លាម ISIS ប៉ុន្តែក្រោយការស៊ើបអង្កេតបានបញ្ចប់ គ្មានមុខសញ្ញាណាមួយបញ្ជាក់ពីការពាក់ព័ន្ធគ្នារវាងម្ចាស់ហាង និងក្រុមឧទ្ទាមនេះឡើយ ប៉ុន្តែនាចុងបញ្ចប់ ខាងម្ចាស់ហាងក៏ព្រមរុះស្លាក ប្ដូរឈ្មោះហាងវិញដែរ ដោយអ្នកស្រីក៏គិតថា វាអាចប៉ះពាល់អារម្មណ៍របស់អតិថិជន ។

គួរបញ្ជាក់ថា តាមពិតឈ្មោះ ISIS នេះមិនមែនទើបតែត្រូវបានគេយកមកប្រើសំដៅលើក្រុមជ្រុលនិយមរដ្ឋឥស្លាមនេះតែប៉ុណ្ណោះទេ ជាក់ស្ដែងវិទ្យាស្ថាន២គឺ Institute for the Scientific Investigation of Sexuality និង Institute for the Secularisation of Islamic Society ក៏មានឈ្មោះហៅកាត់ថា ISIS ដែរ ។

រុស្ស៊ី នឹងជួយសាងសង់ រោងចក្រថាមពលនុយក្លេអ៊ែរ នៅកម្ពុជា

News Soial

ភ្នំពេញ៖ រុស្ស៊ី ដែលជាប្រទេសសំបូរដោយធនធានប្រេងឥន្ធនៈ និងថាមពល បានប្រកាសថា នឹងជួយប្រទេសកម្ពុជា ក្នុងការសាងសង់រោងចក្រថាមពលនុយក្លេអ៊ែរ នេះបើតាមកិច្ចព្រមព្រៀងប្រទេសទាំងពីរបានចុះហត្ថលេខា កាលពីពេលថ្មីៗនេះ ដោយរុស្ស៊ី នឹងផ្តល់នូវអ្នកជំនាញការស្រាវជ្រាវ និងបណ្តុះបណ្តាដល់ប្រទេសកម្ពុជា នេះបើយោងតាមទីភ្នាក់ងារព័ត៌មាន Reuters។

ក្រោមកិច្ចព្រមព្រៀង រវាងរដ្ឋាភិបាលរុស្ស៊ី និងកម្ពុជាលើវិស័យជាច្រើន រួមទាំងវិស័យថាមពលនុយក្លេអ៊ែរផងនោះ កាលពីថ្ងៃ អង្គារកន្លងទៅនេះ មន្ត្រីក្រុមហ៊ុនរដ្ឋរុស្ស៊ីបានឲ្យដឹងថា រុស្ស៊ីនឹងជួយដល់កម្ពុជាក្នុងការកសាងសមត្ថភាព ឈានឆ្ពោះទៅសង់រោងចក្រអគ្គិសនី ដើរដោយថាមពលនុយក្លេអ៊ែរ នៅពេលខាងមុខ។ ការឈានឆ្ពោះទៅសង់រោងចក្រថាមពលនុយក្លេអ៊ែរនេះ នឹងជួយដល់កម្ពុជាច្រើនក្នុងការកាត់បន្ថយលើការចំណាយលើថាមពល និងអាចជួយជម្រុញកំណើនសេដ្ឋកិច្ចកម្ពុជាបន្ថែមទៀត។

ប្រទេសកម្ពុជាបាននាំចូលប្រេងឥន្ធនៈនិងថាមពលពីប្រទេសក្រៅ ដោយតម្លៃអគ្គិសនីនៅកម្ពុជា គឺស្ថិតក្នុងចំណោមតម្លៃថ្លៃបំផុត នៅអាស៊ីអាគ្នេយ៍។ ជាងនេះផងដែរ កម្ពុជាក៏កំពុងស្វែងរកទំហំទឹកប្រាក់វិនិយោគប្រមាណ ៣ពាន់លានដុល្លារ ដើម្បីកសាងទំនប់វារីអគ្គិសនីចំនួនប្រាំមួយ នៅឆ្នាំ ២០១៨ ស្របជាមួយនឹងកំណើនតម្រូវការប្រជាជនកើនឡើងឥតឈប់ឈរ។

គូសបញ្ជាក់ដែរថា កម្ពុជាចាំបាច់ណាស់ ក្នុងការកសាងទំនប់វារីអគ្គិសនីច្រើនផ្ទាល់ខ្លួន ព្រោះវាជាប្រភពស្នូលដ៏ធំ ក្នុងការអភិវឌ្ឍខឿនសេដ្ឋកិច្ចជាតិ ដោយពុំចាំបាច់ពឹងផ្អែក លើការផ្គត់ផ្គង់ពីប្រទេសដទៃ។ បច្ចុប្បន្នប្រទេសជាច្រើន នៅអាស៊ីអាគ្នេយ៍ កំពុងផ្តោតលើការស្រាវជ្រាវ និងដាក់ផែនការជំរុញការសាងសង់រោងចក្រនុយក្លេអ៊ែរនេះដែរ តួយ៉ាងដូចជាវៀតណាម និងហ្វីលីពីន ជាដើម៕

ក្រោយថតរឿងក្ដៅសាច់ តួស្រី Angeline Yap ត្រូវប្រុសៗសុំរួមភេទ

News

នាង Angeline Yap ត្រូវបានអ្នកលេងអ៊ីនធឺណិតប្រុសៗសុំរួមរ័ក បន្ទាប់ពីពួកគេឃើញនាងថតរឿងក្ដៅសាច់ ” Lang Tong “។ នេះបើតាមការចុះផ្សាយរបស់គេហទំព័រ Channelnewsasia ម្សិលមិញ។

ក្នុងសន្និសីទមួយស្ដីពីភាពយន្ត កាលពីថ្ងៃអង្គារ អតីតបវរកញ្ញាលេខ៣ សិង្ហបុរីរូបនេះបង្ហើបថា ចាប់តាំងពីពេលនោះមក នាងទទួលការរំលោភបំពានដោយពាក្យសម្ដីជាច្រើនតាមអនឡាញ។

“ខ្ញុំទទួលបានការស្នើសុំ មិនសមរម្យជាច្រើន…ពួកគេសុំខ្ញុំដេក ហើយមតិភាគច្រើនគិតតែអារឿងហ្នឹង។ ពួកគេថា ខ្ញុំជាស្រីមិនល្អ b**** អន់ជាងលាមក s*** ថោកទាប និងថាអនាគតកូនៗ និងប្ដីខ្ញុំមិនគោរពខ្ញុំទេ ព្រោះតែខ្ញុំដើរតួអង្គនេះ។ ចំណែកខ្ញុំក៏បានឆ្លើយតប Comment ទៅអ្នកទាំងនោះវិញ ប៉ុន្តែអ្នកដឹកនាំរឿង Sam Loh ប្រាប់ខ្ញុំកុំឱ្យខ្វល់នឹងពួកគេ…ខ្ញុំក៏ឈប់”។ នាងបញ្ជាក់។

តារាវ័យ២៧ឆ្នាំបន្ថែមថា “មនុស្សទាំងអស់ មានទស្សនៈខុសគ្នា ខ្ញុំមិនអាចបញ្ឈប់អ្វី ដែលពួកគេចង់និយាយទេ តែខ្ញុំនឹងមិនឱ្យពួកគេ ធ្វើអ្វីប៉ះពាល់ខ្ញុំឡើយ។ ខ្ញុំមិនអាចតម្រូវចិត្ត មនុស្សគ្រប់គ្នាបានទេ”។

ក្រោយក្ដាប់បានតំណែងតួសំបូរឈុតស្រើបស្រាល ក្នុងរឿង “Lang Tong “ Yap ប្រាប់ទៀតថា នាងមិនស្ដាយក្រោយឡើយ ព្រោះវាជាភាពយន្តសិល្បៈ ហើយវាខុសប្លែកពីរឿងក្នុងស្រុកផ្សេងទៀត ប៉ុន្តែនាងមានការព្រួយបារម្ភតិចតួចដែរ ចំពោះឪពុកម្ដាយ។

“ខ្ញុំអត់បានប្រាប់ពួកគាត់ទេពេលដើរតួនេះ ហើយពួកគាត់ទើបតែដឹង ពេលលេចព័ត៌មាននេះឡើង។ ពួកគាត់ខឹងខ្លាំងណាស់ តែខ្ញុំព្យាយាមប្រាប់ពួកគាត់ថា វាគ្រាន់តែជាការសម្ដែង និងជាភាពយន្តសិល្បៈ។ ពួកគាត់ជាចាស់ជំនាន់មុន ដូច្នេះមិនសូវបើកចំហ និងនៅតែមិនអាចទទួលយកបាន”។ តារាស្រីដដែលបន្ថែម។

Yap បញ្ជាក់ថា ក្រោយមកឪពុកម្ដាយស្រួលចិត្តបន្តិចវិញ តែពួកគាត់ប្រាប់នាងថា កុំដើរតួបែបនេះទៀត។ ទោះបីជាយ៉ាងណា Yap នឹងនៅតែបន្តសម្ដែងតួស្រដៀងនេះទៀតក្នុងពេលខាងមុខ បើសិនជាអ្នកដឹកនាំរឿងត្រូវការ ហើយនាងយល់ថាសាច់រឿងល្អ។ ក្រោយសម្ដែងរឿងខាងលើ នាងត្រូវផលិតកម្មនានាទាក់ទង ហើយតារាស្រីរូបនេះប្រាប់ថា ពួកគេចង់ថតជាមួយនាង និងចង់ថតជាភាពយន្តសិច។

ភាពយន្ត ” Lang Tong “ បានចាក់បញ្ចាំងហើយ នៅក្នុងព្រឹត្តិការណ៍ Singapore International Film Festival កាលពីឆ្នាំ ២០១៤ ប៉ុន្តែឈុតខ្លះត្រូវបានដកចេញ៕

កំពង់ផែស្វយ័តក្រុងភ្នំពេញ កំណត់តម្លៃភាគហ៊ុន ៥១២០៛ ក្នុងការបោះផ្សាយមូលបត្រសាធារណៈ ជាលើកដំបូង

Business News

ភ្នំពេញ៖ បន្ទាប់ពីកំពង់ផែស្វយ័តក្រុងភ្នំពេញហៅកាត់ថា PPAP បានធ្វើប៊ុកបៀលឌីង សម្រាប់វិនិយោគិនជាស្ថាប័នរួចមក ក្រុមហ៊ុនដែលជាសហគ្រាសរដ្ឋ ប្រតិបត្តិការកំពង់ផែធំទីពីរនៅកម្ពុជា បានកំណត់តម្លៃភាគហ៊ុនរបស់ខ្លួនក្នុងតម្លៃ ៥១២០រៀល (១.២៦ដុល្លារអាមេរិក) ខណៈសហគ្រាសនេះរំពឹងថា នឹងប្រមូលធនចំនួន ៥.២លានដុល្លារអាមេរិក នៅក្នុងការបោះផ្សាយមូលបត្រសាធារណៈ(IPO) ជាលើកដំបូង។

ក្នុងការបោះផ្សាយមូលបត្រសាធារណៈជាលើកដំបូង (IPO) របស់កំពង់ផែស្វយ័តក្រុងភ្នំពេញនេះ រំពឹងថានឹងរកបានប្រាក់ចំនួន ៥.២លានដុល្លារអាមេរិក តាមរយៈការលក់ភាគហ៊ុនរបស់ខ្លួនចំនួន ២០ភាគរយនៅលើទីផ្សារកម្ពុជា នៅក្នុងខែធ្នូខាងមុខនេះ។ ម្យ៉ាងវិញទៀតក្នុងរយៈពេលកន្លងមក គេសម្លឹងឃើញថាបន្ទាប់ពី PPAP ប្រកាសបោះផ្សាយមូលបត្រសាធារណៈនេះ ហាក់ទទួលបានការចាប់អារម្មណ៍ច្រើនពីអ្នកវិនិយោគក្នុង ផ្សារហ៊ុននេះ។

លោក Thomas Hugger អគ្គនាយកក្រុមហ៊ុនវិនិយោគ Asia Frontier Capital បានមានប្រសាសន៍ថា លទ្ធផលតម្លៃភាគហ៊ុនរបស់ PPAP បង្ហាញពីចំណាប់អារម្មណ៍របស់វិនិយោគិន ទំនងជាមិនខ្ពស់ដូចការរំពឹងរបស់មនុស្សមួយចំនួននោះទេ តែតម្លៃនេះអាចជួយគាំទ្រតម្លៃរបស់ភាគហ៊ុន នៅពេលធ្វើការជួញដូរ។

បន្ថែមពីលើនេះដែរ តម្លៃភាគហ៊ុនរបស់ PPAP ស្ថិតក្នុងចន្លោះតម្លៃពី ៤៤០៥ រៀល ដល់ ៦៣០២ រៀល (ពី ១.០៨ ដល់ ១.៥៥ ដុល្លារ) ដែលបានកំណត់ក្នុងពេលធ្វើប៊ុកបៀលឌីង ផ្ដល់ឲ្យសហគ្រាសរដ្ឋមួយនេះនូវ មូលធនីយកម្មទីផ្សារចំនួន ២៦លានដុល្លារអាមេរិក។ ហើយបើតាម PPAP បានឲ្យដឹងថា ខ្លួនគ្រោងនឹងប្រើប្រាស់មូលធន ដែលប្រមូលនេះ ដើម្បីផ្ដល់មូលនិធិក្នុងការពង្រីកអាជីវកម្មរបស់ខ្លួន។

នារយៈពេលចុងក្រោយនេះ រដ្ឋាភិបាលបានប្រឹងប្រែងយ៉ាងខ្លាំងក្នុងកិច្ចការ IPO របស់ PPAP ដោយសង្ឃឹមថានឹង ពង្រឹងទីផ្សារមូលធនរបស់ប្រទេសនេះ។ ក្រុមហ៊ុនផ្សារមូលបត្រកម្ពុជា (CSX) បាន ព្យាយាមទាក់ទាញវិនិយោគិន ចាប់តាំងពីការចាប់ផ្ដើមដំណើរការដំបូងកាលពីឆ្នាំ ២០១១ ហើយមានក្រុមហ៊ុនតែពីរប៉ុណ្ណោះបានចុះបញ្ជី៕

រុស្ស៊ី និង បារាំង ព្រមព្រៀងគ្នាវាយប្រហារទៅលើក្រុម ISIS តែមួយប៉ុណ្ណោះ

News Soial

ប្រធានាធិបតី បារាំង លោក Francois Hollande និងប្រធានាធិបតី រុស្ស៊ី លោក Vladimir Putin បានជួបគ្នាក្នុងទីក្រុង មូស្គូ ដើម្បីពិភាក្សាស្ដីអំពីកិច្ចសហប្រតិបត្តិការប្រយុទ្ធប្រឆាំងនឹងក្រុម ISIS ប៉ុន្តែមេដឹកនាំប្រទេសមហាអំណាចទាំងពីរនេះ នៅមានចំណុចខ្លះដែលខ្វែងគំនិតគ្នា ពិសេសអំពីជោគវាសនារបស់ប្រធានាធិបតី ស៊ីរី លោក Bashar al-Assad ក្នុងនោះ បារាំង យល់ថា លោក Assad មិនត្រូវមានតួនាទីណាមួយឡើយក្នុងជួរអ្នកនយោបាយ ដែលផ្ទុយពី រុស្ស៊ី ដែលចង់ឲ្យលោក Bashar al-Assad ត្រូវបានសម្រេចដោយប្រជាជន ស៊ីរី ។ នេះបើតាមការចុះផ្សាយរបស់សារព័ត៌មាន The Times of Esrael នៅថ្ងៃសុក្រនេះ ។

ទោះយ៉ាងណា ប្រធានាធិបតី រុស្ស៊ី និង បារាំង បានយល់ស្របគ្នាក្នុងទីក្រុង មូស្គូ ថា នឹងរួមគ្នាវាយប្រហារសំដៅទៅរកក្រុមISIS តែមួយប៉ុណ្ណោះ ។ លោក ពូទីន និយាយថា រុស្ស៊ី និង បារាំង បានយល់ស្របគ្នាអំពីការប្រយុទ្ធនឹងក្រុម ISIS ដោយជៀសវាងមិនវាយប្រហារទៅលើក្រុមទាំងឡាយណាដែលចូលរួមប្រយុទ្ធនឹងក្រុម ISIS ប៉ន្តែនឹងមានការផ្លាស់ប្ដូរព័ត៌មានជាក់លាក់ច្រើនថែមទៀតថាតើក្រុមណាដែលជាក្រុមភេរវកម្ម និងក្រុមណាដែលជួយប្រយុទ្ធប្រឆាំងនឹងភេរវកម្ម ។

ចំណែកលោក Hollande និយាយថា ប្រទេស បារាំង នឹងបង្កើនការគាំទ្រដល់ក្រុមឧទ្ទាមដែលកំពុងប្រយុទ្ធនឹងក្រុម ISIS តំណាលពេលដែលលោក Putin អះអាងថា មានតែកងទ័ពរដ្ឋាភិបាល ស៊ីរី ប៉ុណ្ណោះដែលមានសមត្ថភាពគ្រប់គ្រាន់ក្នុងការប្រយុទ្ធទប់ទល់នឹងក្រុមភេរវកម្ម ហើយក្រុមដទៃដែលកំពុងធ្វើសកម្មភាពក្នុងប្រទេស ស៊ីរី ដូចជា Jabhat al-Nusra និងក្រុមដទៃទៀត មិនបានអនុវត្តប្រតិបត្តិការវាយប្រហារថ្មើរជើងខ្លាំងក្លាដូចកងទ័ពលោក Bashar al-Assad ឡើយ ។ លោក Putin បន្ថែមថា ប្រហែលពុំមានក្រុមប្រឆាំងណាមួយក្នុងប្រទេស ស៊ីរី ដែល រុស្ស៊ី ត្រូវធ្វើសហប្រតិបត្តិការជាមួយឡើយ ។

អាល្លឺម៉ង់បំផ្លាញផែនការវាយប្រហារក្នុងទីក្រុង ប៊ែរឡាំង

News Soial

កងកម្លាំងពិសេសរបស់ប្រទេស អាល្លឺម៉ង់ បានចាប់ខ្លួនបុរសពីរនាក់ ក្នុងប្រតិបត្តិការឆ្មក់ចាប់ខ្លួនជនសង្ស័យក្នុងមជ្ឈមណ្ឌលវប្បធម៌ឥស្លាម ស្ថិតក្នុងសង្កាត់ Britz របស់ទីក្រុង ប៊ែរឡាំង ដើម្បីបំផ្លាញផែនការរបស់ក្រុមឧក្រិដ្ឋកម្មដែលមានបំណងធ្វើសកម្មភាព ។

គេហទំព័រ The Irish Times ចុះផ្សាយថា ជនសង្ស័យទាំងពីរនាក់ មិនត្រូវបានអាជ្ញាធរបញ្ជាក់អំពីអត្តសញ្ញាណឡើយ ប៉ុន្តែគេដឹងថា បុរសម្នាក់មានអាយុ ២៨ ឆ្នាំ និងម្នាក់មានអាយុ ៤៦ ឆ្នាំ ហើយអគ្គរដ្ឋអាជ្ញាទីក្រុង ប៊ែរឡាំង កំពុងដឹកនាំការស៊ើបអង្កេត ។ ប៉ូលិសនិយាយថា ពួកគេទទួលបានដំណឹងអំពីលទ្ធភាពអាចមានការគំរាមមួយ ក្នុងទម្រង់ជាការរៀបចំសកម្មភាពដែលបង្កគ្រោះថ្នាក់ដល់ប្រទេសជាតិ ។

ប៉ូលិសបានបញ្ជូនអ្នកជំនាញផ្នែកគ្រឿងផ្ទុះ ទៅត្រួតពិនិត្យមើលកាបូបមួយដែលគួរឲ្យសង្ស័យ នៅក្នុងរថយន្តរបស់បុរសទាំងពីរនាក់នោះ ព្រមទាំងជម្លៀសពលរដ្ឋដែលមានផ្ទះនៅជុំវិញចំណតរថយន្ត ឲ្យចាកចេញបណ្ដោះអាសន្ន ។

អធិការបតី អាល្លឺម៉ង់ លោកស្រី Angela Merkel និយាយថា ការគំរាមផ្នែកសន្តិសុខទៅលើប្រទេស អាល្លឺម៉ង់ នៅតែស្ថិតកម្រិតមួយខ្ពស់ ចាប់តាំងពីភេរវជនវាយប្រហារទីក្រុង ប៉ារីស ប្រទេស បារាំង កាលពីថ្ងៃទី១៣។

ក្រុមហ៊ុន Apple Inc បើកសាខានៅវៀតណាម ខណៈ iPhone 6s និង 6s plus ទើបមកដល់កម្ពុជានៅថ្ងៃនេះ

News Tech

ក្រុមហ៊ុន Apple Inc បានបើកក្រុមហ៊ុនបុត្រសម្ព័ន្ធមួយរបស់ខ្លួន នៅប្រទេសវៀតណាម ដើម្បីឲ្យក្រុមហ៊ុនផលិតទូរសព័្ទ iPhones នេះអាចនាំចូល និងចែកចាយទូរស័ព្ទស្មាតហ្វូន ដោយផ្ទាល់ នៅក្នុងទីផ្សារទូរស័ព្ទស្វាតហ្វូន ដែលលូតលាស់ជាងគេនៅតំបន់អាស៊ីប៉ាស៊ីហ្វិក។

ក្រុមហ៊ុនបុត្រសម្ព័ន្ធនេះមានឈ្មោះថា Apple Vietnam Limited Liability ត្រូវបានបង្កើតឡើងកាលពីថ្ងៃទី ២៨ ខែតុលា ជាមួយដើមទុន ដែលចុះក្នុងបញ្ជីមានតម្លៃ ១៥ប៊ីលានដុង (ស្មើនឹង ៦៧២,១៩៤ ដុល្លារអាមេរិក)។

ក្រុមហ៊ុនបុត្រសម្ព័ន្ធរបស់ Apple ដែលមានមូលដ្ឋាននៅទីក្រុង ហូជីមិញមួយនេះ នឹងគ្រប់គ្រងនៃការធ្វើអាជីវកម្មការលក់ដុំនៃ ប្រភេទផលិតផលផ្សេងៗគ្នា ដែលក្នុងនោះរួមមានផលិតផលទូរស័ព្ទស្មាតហ្វូន ការផ្តល់នូវពត៌មានបច្ចេកវិទ្យា និងសេវាជួសជុល ព្រមទាំងសេវាកម្មផ្តល់ទីប្រឹក្សាផងដែរ។

គួជម្រាបថា ចំនួនអ្នកប្រើប្រាស់ទូរស័ព្ទចល័តនៅវៀតណាមកើនឡើង ២៦ភាគរយស្មើនឹង ១២៤លាននាក់ ដោយគិតចាប់តាំងឆ្នាំ ២០០៩ រហូតដល់ឆ្នាំ ២០១៣ ខណៈដែលចំនួនអ្នកប្រើប្រាស់អ៊ីនធើណេតកើនលើសពី ១ភាគ៣ នៃចំនួនប្រជាជន ៩០លានលាក់ ក្នុងរយៈពេល ២ឆ្នាំកន្លងមកនេះ។

ទន្ទឹមនេះដែរ ទូរស័ព្ទស្មាតហ្វូនស៊េរីថ្មីរបស់ក្រុមហ៊ុន Apple គឺ iPhone 6s និង iPhone 6s Plus ទើបតែមានវត្តមាននៅលើទីផ្សារនៅកម្ពុជា ជាផ្លូវការនៅថ្ងៃនេះ ដែលនាំចូលដោយក្រុមហ៊ុន iOne៕

អភិបាលរងរាជធានីភ្នំពេញនិងម្ដាយរបស់លោក ទទួលមរណភាពព្រឹកមិញជាមួយគ្នា

News Soial

រាជធានីភ្នំពេញ៖ ឯកឧត្ដម ជ្រាង សុផាន់ អភិបាលរងរាជធានីភ្នំពេញ បានទទួលមរណៈភាពហើយ កាលពីព្រឹកថ្ងៃទី២៧ ខែវិច្ឆិកា ឆ្នាំ២០១៥នេះ នាវេលាម៉ោង០៥និង០០នាទី ដោយរោគាពាធ ហើយលើសពីនេះទៅទៀត លោកយាយឧបាសិកាដែលជាម្ដាយឯកឧត្ដម ជ្រាង សុផាន់ ក៏បានទទួលមរណភាពនាអំឡុងម៉ោង០៤ព្រឹកផងដែរ។ នេះបើយោងតាមការឲ្យដឹងលើទំព័រ Facebook របស់ឯកឧត្ដម ប៉ា សុជាតិវង្ស អភិបាលរាជធានីភ្នំពេញ នៅព្រឹកនេះ។

4G LTE របស់ សែលកាត ដាក់ឲ្យដំណើរការហើយ

Business News Tech

ភ្នំពេញ៖ ក្រុមហ៊ុន សែលកាត បានសម្ពោធដាក់ឲ្យដំណើរការ និងប្រើប្រាស់ប្រព័ន្ធ 4G LTE ជាផ្លូវការនៅក្នុងរាជធានីភ្នំពេញ និងតាមបណ្ដាខេត្តចំនួនប្រាំមួយ ក្នុងប្រទេសកម្ពុជា។ 4G LTE គឺជាបច្ចេកវិទ្យាទូរគមនាគមន៍ចល័ត ដែលអាចឲ្យលោកអ្នកទទួលបាននូវ ល្បឿនអ៊ីនធើណិតដ៏លឿន។

ក្រុមហ៊ុន សែលកាត នឹងតភ្ជាប់ល្បឿនអ៊ីនធើណិត 4G LTE ទៅកាន់បណ្ដាខេត្តមួយចំនួន រួមមាន ខេត្តបាត់ដំបង បន្ទាយមានជ័យ សៀមរាប កំពង់ចាម ស្វាយរៀង និងក្រុងព្រះសីហនុ។ គូសបញ្ជាក់ដែរថា លក្ខណៈពិសេសនៃល្បឿន 4G LTE គឺអាច Download ទំហំ ២០MB ដោយប្រើប្រាស់រយៈពេលត្រឹមតែ ២៥វិនាទី បើធៀបទៅនឹង 3G គឺត្រូវការរយៈពេល ៣នាទី។ មិនតែប៉ុណ្ណោះ ថែមទាំងអាច Upload និង Update បានលឿន និងអាចបើកអ៊ីនធើណិតបានច្រើនទំព័រ ក្នុងពេលតែមួយ។

លោក Lan Waston នាយកប្រតិបត្តិក្រុមហ៊ុន សែលកាតបានថ្លែងថា៖ «យើងជឿជាក់ថា សែលកាតផ្តល់ជូនអតិថិជនជាមួយនឹង បទពិសោធន៍ឌីជីថលដ៏សមស្របមួយ ហើយឥឡូវនេះយើងឃើញថា អ្នកប្រើប្រាស់ទូរស័ព្ទ ដែលមានសមត្ថភាពដែលភ្ជាប់ប្រព័ន្ធ 4G លើទីផ្សារគឺ មានចំនួនច្រើនគួរឲ្យសម្គាល់។ ទន្ទឹមនឹងនេះដែរ ក្រុមការងាររបស់សែលកាតនឹងខិតខំកែសម្រួលបណ្ដាញ ធ្វើយ៉ាងណាដើម្បីឲ្យល្បឿនអ៊ីនធើណិត 4G LTE មានដំណើរការល្អផ្ដាច់គេ»។

សម្រាប់អតិថិជនរបស់ក្រុមហ៊ុន សែលកាត ទាំងអស់ លោកអ្នកអាចមកប្ដូរស៊ីមកាត 4G LTE ដោយឥតគិតថ្លៃ។ សម្រាប់ព័ត៌មានបន្ថែមពីរបៀបប្រើបច្ចេកវិទ្យា 4G LTE សូមទូរស័ព្ទទៅលេខ 812 រៀងរាល់ថ្ងៃពេញ 24 ម៉ោង។

គួរជម្រាបដែរថា បើតាមតួលេខក្រសួងប្រៃសណីយ៍ និងទូរគមនាគមន៍កម្ពុជា ក្នុងរយៈពេល ៥ឆ្នាំចុងក្រោយនេះ អ្នកប្រើអ៊ិនធើណិតបានកើនឡើង ដែលមានចំនួនរហូតដល់ទៅជាង ៥លាន ៧ម៉ឺន ៤ពាន់នាក់។ នេះបើគិតត្រឹមខែកុម្ភៈ ឆ្នាំ ២០១៥ តែអំឡុងឆ្នាំ ២០១០ គឺមានតែជាង ៣២ម៉ឺននាក់តែប៉ុណ្ណោះ។ តួលេខនេះបានកើនឡើងចំនួន ១៦ដង ហើយច្រើនជាង ១ភាគ៣នៃប្រជាជនកម្ពុជាសរុប៕

មីក្រូហិរញ្ញវត្ថុស្ថាបនាលីមីតធីត នឹងប្ដូរខ្លួនជា ធនាគារនៅឆ្នាំក្រោយ

Business News

ភ្នំពេញ៖ មីក្រូហិរញ្ញវត្ថុស្ថាបនាលីមីតធីត គ្រោងនឹងប្ដូរខ្លួនទៅជា ធនាគារស្ថាបនា ភីអិលស៊ី នៅអំឡុងត្រីមាសទី១ ដើមឆ្នាំ ២០១៦ ខាងមុខ ដោយសហការជាមួយ ធនាគារម៉ារូហាន់។ ការបង្ហាញខ្លួនថ្មីស្រឡាង ក្នុងឋានៈជាធនាគារនេះ យោងទៅតាមសេចក្ដីប្រកាសពីលោក បណ្ឌិត ប៊ុន មុនី នាយកប្រតិបត្តិនៃស្ថាបនាលីមីតធីត ដែលថ្លែង ក្នុងពិធីបូកសរុបលទ្ធផលការងារប្រចាំឆ្នាំ ២០១៥។

តាមរយៈសេចក្ដីប្រកាសពត៌មានរបស់ នាយកប្រតិបត្តិខាងលើ បានឲ្យដឹងទៀតថា មីក្រូហិរញ្ញវត្ថុស្ថាបនាលីមីតធីត នឹងអាចប្ដូរឈ្មោះទៅតាមការគ្រោងទុក បន្ទាប់ពីធនាគារជាតិ ចេញសេចក្ដីប្រកាសអនុញ្ញាតផ្ដល់អាជ្ញាប័ណ្ណបានឆាប់។ លោកនាយកប្រតិបត្តិ ក៏បានគូសបញ្ជាក់បន្ថែមដែរថា៖ «មីក្រូហិរញ្ញវត្ថុស្ថាបនាលីមីតធីត បានសហការជាមួយធនាគារម៉ារូហាន់តាំងពីដើមឆ្នាំ ២០១៥ ដោយចុះកិច្ចព្រមព្រៀងដាក់ភាគហ៊ុនតែមួយ និងយល់ព្រមដាក់ឈ្មោះតែមួយ ហើយបច្ចុប្បន្ន មីក្រូហិរញ្ញវត្ថុស្ថាបនាលីមីតធីត និងធនាគារម៉ារូហាន់ ទាំងពីរមានដើមទុនសរុបប្រមាណ ១២០លានដុល្លារអាមេរិក។

យោងតាមទស្សនាវដ្តីពាណិជ្ជកម្ម កម្ពុជា ដែលចេញផ្សាយលេខ ១៨ ខែកុម្ភៈ ឆ្នាំ ២០១៥ ដោយបានធ្វើកិច្ចសម្ភាសន៍ ជាមួយលោកបណ្ឌិត ប៊ុន មុនី បានប្រាប់អំពីយុទ្ធសាស្ត្ររបស់ស្ថាបនា គឺផ្ដោតសំខាន់លើការជួយអ្នកក្រ ដោយផ្ដល់កម្ ចីដើម្បីជួយជីវភាពពួកគាត់មានការរីកចម្រើន។ ក្នុងនោះក៏ផ្ដោតសំខាន់លើសហគ្រាសធុនតូច និងមធ្យម (SME) ដែរ។

គួរជម្រាបដែរថាតាមទស្សនាវដ្ដីដដែល បានសរុបអាជីវកម្មផ្ដល់កម្ចីតូចៗ ក្នុងវិស័យមីក្រូហិរញ្ញវត្ថុទាំងអស់ មានរហូតដល់ជាង ២៤៥ស្ថាប័ន ក្នុងនោះស្ថាប័នលេចធ្លោបំផុតមានចំនួនប្រាំពីរ ដែលស្ថាប័នស្ថិតក្នុងលំដាប់ខ្ពស់រួមមាន មីក្រូហិរញ្ញវត្ថុប្រាសាក់ អេអឹមខេ និងមីក្រូហិរញ្ញវត្ថុស្ថាបនាលីមីតធីត៕

គិតត្រឹមខែតុលា ធនាគារអេស៊ីលីដាចំណេញប្រាក់ជិត៩២លានដុល្លារអាមេរិក

Business News

រាជធានីភ្នំពេញ៖ លោកបណ្ឌិត អិុន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី បានអះអាងឲ្យដឹងថា គិតមកត្រឹមខែតុលា ឆ្នាំ២០១៥នេះ ធនាគាររអេស៊ីលីដា បានចំណេញទឹកប្រាក់ជិត៩២លានដុល្លារអាមេរិក។ នេះបើយោងតាមប្រភពចុះផ្សាយពីអគ្គស្នងការដ្ឋាននគរបាលជាតិ នៅថ្ងៃទី២២ ខែវិច្ឆិកា ឆ្នាំ២០១៥នេះ។

តាមការដកស្រង់សម្ដីរបស់លោកបណ្ឌិត អិុន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី ពីអគ្គស្នងការដ្ឋាននគរបាលជាតិ បានបញ្ជាក់ថា ឥណទានដែលលេចធ្លោផ្ដល់ឲ្យអតិថិជន គឺផ្នែកពាណិជ្ជកម្ម ដែលមានប្រមាណជា៤០ភាគរយ នៃឥណទានសរុប ហើយបន្ទាប់មក គឺឥណទានផ្នែកកសិកម្ម មានប្រមាណជា២០ភាគរយ គិតមកត្រឹមខែតុលា ឆ្នាំ២០១៥នេះ។

ស្រង់ពីប្រភពដដែល លោកបណ្ឌិត អិុន ចាន់នី បាននិយាយដូចនេះថា “ឥណទានពាណិជ្ជកម្មដែលលូតលាស់ខ្លាំង ដោយសារតែរយៈពេលវាខ្លី ហើយវាត្រូវនឹងប្រភពទុនរបស់យើង ជាពិសេសទុនរបស់យើង សម្រាប់ផ្គត់ផ្គង់ការទូទាត់ផ្នែកឥណទានសម្រាប់ក្នុងស្រុក ដែលមានប្រមាណជា២.៧០០លានដុល្លារអាមេរិក”។

ករណីកំណើនធនាគារចេះតែកើនឡើង តាមរយៈការចុះផ្សាយរបស់សារព័ត៌មានថា វាជាការព្រួយបារម្ភនោះ ត្រូវបានលោកបណ្ឌិត អិុន ចាន់នី បកស្រាយថា វាជារឿងល្អ ព្រោះថាកំណើនធនាគារ ពិតជាកើនឡើងមែន ប៉ុន្តែរាល់ឥណទាននៅកម្ពុជា គឺមិនមែនឥណទានសម្រាប់យក ទៅប្រើប្រាស់សម្រាប់ទិញឧបករណ៍សម្ភារៈទំនើបនោះទេ វាជាឥណទានសម្រាប់ផលិតកម្មរបស់ខ្លួនហៅថា ( Productive Loan)។

លោកបណ្ឌិតបញ្ជាក់ថា ឥណទានសម្រាប់ផលិតកម្ម ( Productive Loan) គឺពួកគាត់ខ្ចីលុយយកទៅចាប់ផ្ដើមរកស៊ី និងពង្រីក មុខរបរទាំងសហគ្រាសខ្នាតមធ្យមនិងធុនតូចបំផុត ដើម្បីបង្កើតប្រាក់ចំណូលបង្កើនការងារ ហើយឥណទានបែបនេះ គេហៅថាឥណទានសុវត្ថិភាព៕