កត្តា៤ចំណុចដែលធ្វើឲ្យប្រជាកសិករទទួលទិន្នផលស្រូវខ្ពស់និងលក់បានថ្លៃ

ស្របពេលដែលរដូវប្រមូលផលរបស់បងប្អូនប្រជាកសិករកម្ពុជាយើងបានខិតជិតចូលមកដល់នោះថ្ងៃនេះគេហទំព័រព័ត៌មាន Boyd News សូមណែនាំនូវកត្តាសំខាន់ៗ បួនចំណុចដែលអាចនាំឲ្យបងប្អូនប្រជាកសិករយើងអាចទទួលទិន្នផលខ្ពស់សម្រាប់ការដាំដុះស្រូវ ដែលក្នុងនោះការជ្រើសរើសពូជគឺជារឿងសំខាន់។

បើយោងតាមអត្ថបទផ្សព្វផ្សាយរបស់អង្គការ CEDAC ស្តីពី “ការជ្រើសរើសនិងទុកដាក់ពូជស្រូវឲ្យបានល្អសម្រាប់ប្រើប្រាស់នូវរដូវក្រោយ” បានឲ្យដឹងថា ដើម្បីទទួលបានូវទិន្នផលគួរជាទីគាប់ចិត្ត ឬបានច្រើន កសិករត្រូវចេះចម្រាញពូជស្រូវរបស់ខ្លួនឲ្យបានសុទ្ធល្អ និងមានទំហំវែង ដែលជាកត្តាមួយជំរុញឲ្យមានទិន្នផលខ្ពស់។

ក្នុងនោះដែរ ដើម្បីទទួលបានពូជសុទ្ធបែបនេះ កសិករគួរតែអនុវត្តន៍នូវចំណុចបួន ដូចតទៅនេះ៖ ទីមួយកសិករត្រូវជ្រើសរើសកន្លែងណា ដែលស្រូវលូតលាស់បានល្អជាគេ សម្រាប់ច្រូតទុកជាពូជ។ ទីពីរ រើសយកពូជណាដែលមានកួរមិនល្អ និងកួរខ្លីចេញ ដោយសំរាំងទុកកួរដែលវែងហើយសុទ្ធ។ យកល្អ កួរដែលបានរើសរួច គួរប្រឡេះយកស្មែងខាងក្រោម និងខាងលើចេញ ដោយទុកតែស្មែងកណ្ដាលបានហើយ។

ទីបី យកកូរដែលរើសបានមកប្រឡេះ ឬបែននឹងជើង ដើម្បីគ្រាប់ស្រូវទុកធ្វើជាពូជ ហើយបើឲ្យល្អមែនទែនគួរប្រឡេះដោយដៃ ជៀសវាងការបោកដោយដៃ ឬបោកដោយម៉ាស៊ីន។ និងទីបួន យកគ្រាប់ស្រូវហាលឲ្យបានស្ងួតនិងរក្សាទុកឲ្យបានល្អ តែគួរឧស្សាហ៍យកវាចេញមកហាលដើម្បីរក្សាភាពស្ងួតឲ្យបានល្អ។

សម្រាប់កិច្ចការទាំងអស់នេះ មើលទៅហាក់បីដូចជាចំណាយកម្លាំងច្រើនបន្តិចហើយ ប៉ុន្តែការចំណាយនេះ វានឹងផ្ដល់ផលចំណេញច្រើនសម្រាប់កសិករវិញនៅរដូវក្រោយ ដោយទិន្នផលស្រូវនឹងកើនឡើង២០ភាគរយ ហើយគ្រាប់ស្រូវវិញនឹងសុទ្ធល្អ ព្រមទាំងអាចលក់បានថ្លៃ។ ម្យ៉ាងទៀតដើម្បីច្បាស់ថា ការចំណាយបន្ថែមអស់ប៉ុន្មាន កសិករត្រូវកត់ត្រាពេលវេលា និងថ្លៃកម្លាំងពលកម្មក្នុងការរើសកួរ ប្រឡេះ ឬបែនស្រូវទុកពូជ៕