ហាងខោអាវឈ្មោះ ISIS ត្រូវអាជ្ញាធរចុះស៊ើបអង្កេត សង្ស័យពាក់ព័ន្ធក្រុមជ្រុលនិយម

ហាងខោអាវឈ្មោះ ISIS ត្រូវអាជ្ញាធរចុះស៊ើបអង្កេត សង្ស័យពាក់ព័ន្ធក្រុមជ្រុលនិយម

ចិនជាប្រទេសមួយដែលមានការប្ដេជ្ញាចិត្តខ្ពស់ និងជាគំរូដ៏ល្អក្នុងការកម្ចាត់ចោលក្រុមអង្គការរដ្ឋឥស្លាមជ្រុលនិយម ជាក់ស្ដែងក្នុងប្រទេសនេះ សូម្បីតែហាងខោអាវដែលលើកស្លាកយីហោឈ្មោះ ISIS ក៏អាជ្ញាធរចិនតម្រូវឲ្យរុះចោលភ្លាមៗដែរ នេះបើយោងតាមសារព័ត៌មាន Shanghaiist ។

ហាងខោអាវមួយនេះបានទាក់យកអារម្មណ៍របស់ប្រជាជន និងប៉ូលិសជាច្រើន ដោយសារតែឈ្មោះរបស់វា ។ ម្ចាស់ហាងខោអាវនេះគឺ អ្នកស្រី Chen Hong បានពន្យល់ប្រាប់ប៉ូលិសពីមូលហេតុដែលធ្វើឲ្យគាត់សម្រេចចិត្តយកឈ្មោះហាងដូចនេះថា វាតំណាងឲ្យពាក្យថាកាដូ ដែលជាភាសាចិនសរសេរថា (意思意思) អានថា “yisi yisi” ។

ប៉ូលិសបានចុះធ្វើការស៊ើបអង្កេតលើហាងខាងលើនេះ ដោយសង្ស័យថាមានពាក់ព័ន្ធនឹងក្រុមជ្រុលនិយមរដ្ឋឥស្លាម ISIS ប៉ុន្តែក្រោយការស៊ើបអង្កេតបានបញ្ចប់ គ្មានមុខសញ្ញាណាមួយបញ្ជាក់ពីការពាក់ព័ន្ធគ្នារវាងម្ចាស់ហាង និងក្រុមឧទ្ទាមនេះឡើយ ប៉ុន្តែនាចុងបញ្ចប់ ខាងម្ចាស់ហាងក៏ព្រមរុះស្លាក ប្ដូរឈ្មោះហាងវិញដែរ ដោយអ្នកស្រីក៏គិតថា វាអាចប៉ះពាល់អារម្មណ៍របស់អតិថិជន ។

គួរបញ្ជាក់ថា តាមពិតឈ្មោះ ISIS នេះមិនមែនទើបតែត្រូវបានគេយកមកប្រើសំដៅលើក្រុមជ្រុលនិយមរដ្ឋឥស្លាមនេះតែប៉ុណ្ណោះទេ ជាក់ស្ដែងវិទ្យាស្ថាន២គឺ Institute for the Scientific Investigation of Sexuality និង Institute for the Secularisation of Islamic Society ក៏មានឈ្មោះហៅកាត់ថា ISIS ដែរ ។